Análise de necesidades

Serie de procedementos levados a cabo para obter información que permita identificar as necesidades dun grupo de alumnos con vistas a elaborar un plan de ensino de lingua adecuado aos seus intereses ou revisar ou adaptar un plan xa existente. A análise de necesidades é, xa que logo, unha parte do desenvolvemento do currículo. As necesidades ofrecen á persoa encargada de confeccionar o deseño do curso unha base sólida para a selección dos contidos do programa de acordo coas necesidades obxectivas e subxectivas de cada alumno, de aí a súa importancia no ensino da segunda lingua con fins específicos. Na análise de necesidades cómpre ter en conta:

1. o nivel inicial ou de partida do alumno e o que se pretende acadar;
2. o propósito ou a finalidade para a que se necesita aprender a lingua xunto coas situacións nas que se vai utilizar;
3. as preferencias dos alumnos con respecto á aprendizaxe;
4. a selección e secuenciación dos contidos do curso;
5. a metodoloxía a empregar; e, para rematar,
6. a duración do curso.

Existen unha serie de instrumentos para investigar as necesidades dos alumnos como, por exemplo, os seguintes: enquisas, entrevistas, observación, discusión informal, recollida de datos lingüísticos, etccom.

Existen dous ámbitos dentro da análise de necesidades, que van do máis xeral ao máis específico:

1. Análise de necesidades da situación: características dos estudantes (aspiracións, estilo de aprendizaxe), perfil dos docentes, contexto educativo do programa e limitacións (tempo, orzamento, medios), etc.
2. Análise de necesidades comunicativas: os contextos en que o discente vai utilizar a lingua, as destrezas lingüísticas que van estar implicadas, así como os actos de fala que traen aparellados, e finalmente o nivel de competencia lingüística que se esixe.