Candlin, C. N. & Breen, M. P. 1979. "Evaluating and Designing Language Teaching Materials". Lancaster Practical Papers in English Language Education 2: 172-216.
Tamén materiais de ensino.
Libros e documentos, obxectos e instrumentos en xeral que se empregan no proceso de ensino, ben sexa a modo de apoio ou como soporte básico do mesmo. Entre estes atópanse os libros de texto ou de lectura, os dicionarios, os pósteres, debuxos, cartóns, realia, cintas e reprodutores de audio ou vídeo, computadores, etc. En concreto, os materiais de ensino cumpren as seguintes funcións:
- contextualizan os contidos que se van ensinar por medio de actividades ou tarefas de clase para as que se dispón dun tempo determinado; e
- fan explícitos os obxectivos de aprendizaxe no día a día.
É necesario sinalar, ademais, que algúns materiais se deseñan sobre a base de que a aprendizaxe a inicia e controla o profesor en todo momento, mentres que outro tipo de materiais se preparan para que o alumno traballe só, sen a presenza física do docente ou coa axuda doutros alumnos, do mesmo xeito que ocorre na autoaprendizaxe.
Tradicionalmente, os libros e o material impreso en xeral viñéronse empregando como medio didáctico básico, aínda que na actualidade os avances tecnolóxicos permiten a introdución na aula de medios audiovisuais e informáticos e o desenvolvemento de programas de estudo baseados en teorías de aprendizaxe centradas no alumno, como os programas de estudo de acceso directo ou a aprendizaxe de linguas asistida por computador e os materiais de ensino multimedia. De todos os xeitos, o seu uso non é excluínte e á hora de deseñar unha programación sempre poden combinar distintos tipos de materiais. Isto permite un enfoque didáctico que facilita o ensino das catro destrezas lingüísticas e posibilita un maior achegamento do alumno ao novo idioma e á súa cultura. Para rematar, é preciso destacar o feito de que as distintas metodoloxías do ensino de linguas estranxeiras teñen visións distintas das funcións e das formas concretas que han de adoptar os materiais no proceso de ensino-aprendizaxe.
Pódense empregar materiais xa existentes no mercado (libros de texto, cursos de lingua), material auténtico ou unha combinación dos dous tipos. Nalgúns casos, pódense empregar os materiais que substitúan o profesor e fomenten a autonomía do alumno.
Entradas relacionadas:
Bibliografía:
Nunan, D. 1989. Designing Tasks for the Communicative Classroom. Cambridge: Cambridge University Press.
Richards, J. C. & Rodgers, T. S. 1986. Approaches and Methods in Language Teaching: A Description and Analysis. Cambridge: Cambridge University Press.