Tarefa

Termo empregado por primeira vez no ámbito da lingüística aplicada a principios dos anos 80 do século pasado nos estudos de adquisición de segundas linguas. Así mesmo, vense empregando desde esas mesmas datas no eido do deseño curricular.

Una tarefa é unha actividade que se realiza como resultado de ter entendida ou procesada unha determinada mensaxe; así, por exemplo, debuxar un mapa despois de escoitar unha descrición oral poderíase considerar unha tarefa sinxela. Na meirande parte dos casos o profesor proporciona unha serie de instrucións para que a tarefa se poida levar á práctica. En certo xeito, realizar unha tarefa significa solucionar un problema. Nunan (1989) define este concepto en termos similares aos anteriores, aínda que mantén que no estudo dunha segunda lingua o aprendiz se debe centrar no significado máis que na forma, e ademais insiste en que esta debe constituir un todo en si mesma, podéndose considerar como un acto comunicativo por si soa.

De acordo con Ribé e Vidal (1995), na organización e planificación dunha tarefa débense ter en conta os seguintes aspectos:

1. obxectivo. Refírese a aquilo que se quere practicar, ben contidos estrictamente lingüísticos, culturais ou de control sobre a propia aprendizaxe.
2. input ou aducto. Este pode vir introducido por unha lectura, un diálogo, un anuncio publicitario, un artigo xornalístico, unha cinta, unha canción, etc.
3. actividade. Aquilo que o alumno ten que levar a cabo.
4. papel do profesor. Este pode adoptar diversos roles (asesor, corrector, animador, proporcionador de información lingüística, etc.) dependendo da fase de desenvolvemento da tarefa e a súa tipoloxía.
5. papel do alumno. Ao igual que no caso anterior, o papel do alumno variará en función da estrutura da tarefa e da fase do seu desenvolvemento. En ocasións adoptará un papel meramente pasivo para máis tarde poder converterse en executor, monitor ou avaliador.