Davies, A.; Criper, C. & Howatt, A. (eds.) 1984. Interlanguage. Edinburgh: Edinburgh University Press.
Tamén input e datos de entrada.
Termo que designa a información lingüística que recibe o aprendiz no proceso de adquisición. En ocasións distínguese entre toda a información que se recibe e aquela que realmente lle é útil ao alumno na súa aprendizaxe. Isto coñécese como apropiación de datos e desígnase en inglés co termo intake.
Dependendo da corrente lingüística que trate o aducto, o enfoque varía. Adoitan distinguirse tres puntos de vista principais:
- Condutista. Segundo esta corrente, o aducto consiste nunha serie de estímulos e retroalimentacion (feedback) ou resposta; deste xeito, os factores externos controlan o proceso de adquisición.
- Mentalista. Desde esta perspectiva, a información do aducto ao que están expostos os aprendices é desordenada e insuficiente como para que poidan adquirir a competencia só por imitación. Suponse que os seres humanos posúen unha capacidade innata, especificada para a linguaxe, que permite a todos os nenos conseguir o dominio da súa lingua materna, mediante a exposición aos datos do aducto e á interacción.
- Interaccionista. O interaccionismo cognitivo considera que o aducto é importante na adquisición da lingua, aínda que está determinado polos mecanismos internos do aprendiz.
A investigación en torno ao aducto centrouse fundamentalmente na descrición deste fenómeno e o seu papel no proceso de adquisición da segunda lingua.
Entradas relacionadas:
Bibliografía:
Ellis, R. 1994. The Study of Second Language Acquisition. Oxford: Oxford University Press.
Krashen, S. D. 1985. The Input Hypothesis: Issues and Implications. Harlow: Longman.