Estudo mediante diarios

Co fin de obter maior información sobre as características individuais do alumnado e de como estas poden influír no proceso de aprendizaxe, o docente ou investigador pode levar de xeito periódico un diario ou rexistro escrito. Ademais de datos sobre a evolución lingüística dos estudantes, o diario adoita recoller as impresións persoais do profesor acerca do estudante e da súa propia actuación docente, e información relativa ao contexto no que leva a cabo o labor pedagóxico e ás actitudes do alumnado tanto cara á aprendizaxe do idioma como cara ás estratexias didácticas empregadas na clase.

Mediante os diarios o equipo investigador pode realizar estudos lonxitudinais sobre a aprendizaxe dunha lingua por un estudante ou un grupo de estudantes homoxéneo, tendo en conta as mesmas variables en todos os casos; así mesmo, pode acometer estudos transversais, traballando cunha clase de estudantes heteroxénea e tomando distintas variables en cada caso. No estudo mediante diarios, o profesor/investigador recolle exemplos da evolución lingüística do alumnado de xeito detallado, así como información relativa ao ámbito lingüístico implicado, é dicir, información en torno ao contexto lingüístico ou extralingüístico que rodea a situación de aprendizaxe. Así pois, nun diario figuran datos relativos aos métodos, as estratexias, as técnicas e as actividades empregadas, os obxectivos, os materiais didácticos e os recursos utilizados, os participantes no proceso de aprendizaxe (tanto o docente como o discente), a súa actitude, motivación, produción e comprensión (dominio das catro destrezas), etc.

O estudo de diarios adóitase utilizar como complemento doutras técnicas experimentais de recompilación e análise de datos relacionadas co ensino e aprendizaxe de linguas, tales como o estudo de casos e a investigación acerca de trastornos de aprendizaxe, empregándose como punto de partida para a formulación de hipóteses acerca das posibles causas e solucións a determinados problemas de aprendizaxe: análise das necesidades do alumnado, estudo dos factores que rodean as situacións de aprendizaxe e dos métodos e estratexias empregados, actuación do profesor e eficacia da mesma, etc. Esta metodoloxía de investigación utilízase tamén na área de formación do profesorado.