ECTS

Abreviatura inglesa de European Credit Transfer and Accumulation System, é dicir, “Sistema europeo de acumulación e transferencia de créditos”. Un dos obxectivos estratéxicos do Espazo Europeo de Educación Superior (EEES) é a adopción dun sistema de créditos que facilite a mobilidade do alumnado, os denominados créditos ECTS. Neste novo sistema (xerado a partir de programas de mobilidade de estudantes como o Erasmus) contabilízanse as horas totais de dedicación dos estudantes á materia, é dicir, tanto as horas lectivas como as destinadas ao estudo, realización de actividades propostas, titorías e avaliación. Estímase así que un crédito ECTS equivale a unhas 25 ou 30 horas de traballo total do alumnado. Os créditos ECTS enmárcanse nun sistema de ensino completamente centrado nos estudantes e no seu proceso de aprendizaxe. Esta reorientación do proceso de ensino cara ao alumnado supón novas esixencias para estudantes e profesores. Para os docentes implica a creación de contornas que estimulen a aprendizaxe e o establecemento de estratexias e pautas para o seguimento do traballo que o alumnado leva a cabo dentro e fóra da aula. Para os estudantes supón a adquisición dun maior grao de autonomía, responsabilidade e implicación activa na aprendizaxe.

A adaptación dos planos de estudo dunha universidade ao sistema ECTS require a elaboración de catro documentos: o formulario de candidatura para futuros estudantes, o contrato de estudos que deberán asinar as partes implicadas (estudante e universidades de intercambio), a certificación académica, e o catálogo informativo ou guía docente, na que debe figurar toda a información pertinente sobre a institución, requisitos de acceso, titulacións, planos de estudo e materias. Un dato a ter en conta con respecto ao novo deseño curricular é que os obxectivos non se formulan en termos de contidos, senón de competencias e destrezas que o estudante ten que desenvolver nas diferentes materias, ben de modo lonxitudinal ou transversal.