Transferencia lingüística

Proceso cognitivo selectivo que provoca o uso da lingua nativa, ou de calquera outra lingua que fora previamente adquirida, no proceso de adquisición dunha segunda lingua ou dunha lingua adicional. Empréganse diferentes termos para facer referencia a este fenómeno lingüístico, por exemplo interferencia ou influencia a través das linguas, que parten de supostos teóricos diferentes; sen embargo, o termo transferencia é o máis aceptado. Existen diferentes tipos de transferencia, que se poden clasificar como segue:

1. Transferencia positiva fronte a transferencia negativa. Esta distinción está relacionada coas teorías condutistas e está baseada no produto final; a positiva asóciase ao efecto facilitador da primeira lingua, mentres que a negativa, tamén denominada interferencia, conduce á produción de erros na segunda lingua.
2. Proceso de aprendizaxe fronte a proceso de produción, onde a influencia da primeira lingua baséase en procesos; desde esta perspectiva o produto non é o máis importante.
3. Transferencia manifesta fronte a transferencia encuberta. Esta diferenciación está baseada na percepción que o aprendiz ten da distancia lingüística; na primeira o aprendiz non percibe a similitude entre as linguas mentres que na segunda si o fai. A transferencia encuberta divídese á súa vez en dous tipos: transferencia e préstamo; a primeira implica que o aprendiz percibe a similitude de estrutura entre dúas linguas, e cando non coñece unha estrutura recorre á lingua materna; a segunda está relacionada con cuestións léxicas e implica unha percepción da similitude entre formas léxicas.
4. Transferencia de préstamo fronte a transferencia de substrato, unha distinción baseada na dirección da transferencia: a de préstamo corresponde á influencia da segunda lingua na primeira, e a de substrato corresponde á influencia da primeira na segunda.

A transferencia constitúe un aspecto cognitivo central na hipótese da interlinguaxe.