Enfoque procesual da expresión escrita

enfoque do ensino da expresión escrita que xorde na década de 1970 nos EEUU como reacción contra os enfoques de ensino da escritura centrados na forma, na imitación de modelos e no produto final. Este novo enfoque fai fincapé non só no produto final, senón no propio proceso que se segue ao escribir. Este proceso deberá permitirlle ao alumnado ser quen de crear e descubrir novos significados máis que anotar ideas preconcibidas. Insístese na colaboración entre os alumnos á hora da planificación e redacción de borradores, a reescritura, a discusión en clase e a chuvia de ideas, a corrección realizada polos propios compañeiros, etc. O papel do profesorado é o de facilitarlle ao estudante o desenvolvemento de estratexias co fin de xerar ideas para a redacción, así como revisar e editar o xa escrito.