Titoría de escritura

Nunha titoría de escritura, o docente e o discente ou grupo de discentes intercambian ideas sobre o tema e o xeito de elaborar unha composición escrita. Unha vez que o estudante escribe o primeiro borrador da súa composición reúnese de novo co profesor. Neste encontro o docente pode facerlle preguntas como as que se recollen a continuación a modo de exemplo:

Que aprendiches deste traballo escrito? Por que dis isto e non isto outro? Que pensas incorporar na próxima versión? Sorprendeuche algo no primeiro borrador? Onde te leva esta redacción? Que é o que che gusta máis deste traballo? Tes algunha dúbida?

A titoría de escritura é unha técnica moi común empregada en aquelas aproximacións ao ensino da expresión escrita que lle dan máis importancia á escritura como proceso que como produto. Despois dun período de tempo traballando nesta liña, o estudante tórnase máis autónomo e consegue personalizar o seu método de redacción, ademais de aumentar o seu optimismo con respecto ao que escribe. O alumnado toma decisións perante o seu propio traballo, de tal xeito que as versións que escriben son cada vez de maior calidade. A miúdo autocorríxense sen precisar demasiadas pautas do profesor. Un dos maiores inconvenientes desta técnica radica no tempo necesario para a súa posta en práctica, razón pola que non resulta idónea para grupos numerosos.