Webquest

Unha webquest é unha actividade de aprendizaxe estruturada baseada na investigación, na que se emprega a web como única ou principal fonte de información para resolver unha tarefa complexa. A tarefa obriga ao discente a desenvolver unha actividade mental de alto nivel, empregando habilidades tales como a formación de hipótese, o xuízo, a análise, a creatividade ou a resolución de problemas. Nunha webquest, o docente desempeña un importante papel como facilitador, deseñando unha tarefa que se axuste ás necesidades do aprendente e guiándoo no proceso. Segundo a proposta de Dodge (1995), unha webquest debe posuír cinco compoñentes fundamentais: explicitación do contexto ou razón de ser da procura, definición da tarefa, descrición do proceso (incluídos os recursos e distintos pasos a dar por parte do discente), avaliación e conclusión. Entre outras vantaxes, o uso de webquests 1) contribúe a aumentar a motivación do aprendente, a través de problemas reais en cuxa resolución se empregan materiais auténticos; 2) desenvolve a súa capacidade de pensamento crítico: nunha perspectiva constructivista da aprendizaxe, o discente debe non só comprender a información senón analizala e sintetizala para crear algo novo; e 3) desenvolve a súa capacidade para traballar en equipo: moitas webquests implican un traballo colaborativo e constitúen unha proposta de aprendizaxe centrada no alumno.

No ámbito do ensino de linguas estranxeiras, as webquests están intimamente ligadas a un enfoque do ensino por tarefas ( TBL) ou por contidos ( CBL) , nos que o aprendente desenvolve a súa competencia comunicativa a través de tarefas prácticas. Unha webquest constitúe unha boa experiencia de construción interactiva da aprendizaxe. Entre outras vantaxes, proporciónalle ao aprendente de linguas estranxeiras un contacto directo con material lingüístico e contidos auténticos, pero sobre todo, a oportunidade de practicar as catro destrezas principais da comprensión e a produción tanto oral como escrita. Ademais, dado o seu enfoque colaborativo, unha webquest xera múltiples oportunidades para a interacción na lingua estranxeira. Factores específicos clave no deseño dunha webquest para o ensino de linguas son: unha definición clara dos obxectivos lingüísticos que se perseguen, traballar con materiais extraídos da Web, que as tarefas mostren un grao de dificultade adecuados ao nivel lingüístico do aprendente e un apoio lingüístico centrado no tipo de vocabulario e estruturas gramaticais requiridos para o desenvolvemento da actividade.