Interacción na aula

Modelos de comunicación verbal e non verbal, e conxunto de pautas de intercambio social que teñen lugar dentro da aula. O concepto de interacción está ligado aos estudos da psicoloxía evolutiva e a psicoloxía social, que explican o desenvolvemento intelectual e cognitivo do individuo en función das relacións que este establece co “outro”, é dicir, con outros individuos e co medio. Os procesos de interacción están intimamente relacionados cos de socialización, que tratan daqueles cambios que teñen lugar no individuo como resultado da interacción/relación cos demais a medida que vai madurando. Os procesos de socialización evolucionan paralelamente aos procesos de desenvolvemento cognitivo, é dicir, a cognición ten a súa orixe no intercambio social, mediante o cal os nenos aprenden a controlar os seus propios procesos cognitivos.

Do mesmo xeito que o resto dos contextos sociais, o estudo da interacción na aula é de grande importancia dado que a aula é un marco no que se establece un amplo abano de relacións sociais entre todos os seus compoñentes (discente-discente, docente-discente), o cal repercute no proceso de aprendizaxe. Este feito é especialmente relevante na aprendizaxe de linguas: a interacción cos demais e co medio constitúe a base para a adquisición tanto da L1 como da L2, e propicia a boa ou mala predisposición do alumno con respecto á aprendizaxe.

A interacción na aula estudouse mediante métodos de observación e clasificación das distintas condutas verbais e non verbais que se dan nese contexto. Estes estudos teñen como obxectivo determinar o papel dos procesos de interacción social nas distintas situacións de aprendizaxe.

O estudo da interacción na aula pode ser unha parte importante na investigación sobre o discurso de aula, a fala do profesor e a adquisición de segundas linguas en xeral.