Poboación

En estatística, conxunto de entidades (obxectos, individuos, etc.) que comparten algunha característica observable e que son obxecto dunha investigación. Existen poboacións finitas (aquelas nas que o número de entidades é fixo e contable, por exemplo, o número de verbos empregados nunha obra literaria), e poboacións potencialmente infinitas, como o tempo empregado en ler unha oración, que pode medirse infinitas veces con resultados distintos. Cando a poboación finita non é moi ampla, a investigación pode basearse nela; con todo, se a poboación é potencialmente infinita, ou finita pero moi ampla, será necesario seleccionar unha mostra representativa. Por exemplo, unha selección de cen estudantes que leven cinco anos estudando italiano como L2 constituirá unha mostra de toda a poboación de estudantes con esa característica. Logo de analizar a mostra, os resultados obtidos pódense facer extensivos á poboación no seu conxunto a través das técnicas de estatística inferencial.

As propiedades que posúen os elementos dunha poboación denomínanse caracteres: os cualitativos ou atributos, como o sexo ou a nacionalidade, poden adoptar distintas modalidades (masculino / feminino; inglés / francés / español); os cuantitativos (por exemplo, a idade) son medibles, e adoptan valores numéricos dentro dun conxunto chamado dominio.