Suxestopedia

Tamén método de Lozanov.

método de ensino de segundas linguas desenvolvido polo búlgaro Georgi Lozanov, que sostén que a aprendizaxe máis efectiva e agradable para o estudante ten lugar por medio da suxestión cando este se atopa nun estado relaxado e de baixa ansiedade. Neste método préstase tanta atención á comunicación consciente (a mensaxe lingüística) como á subconsciente (a mensaxe transmitida a través de xestos, movementos, etc.). O seu obxectivo é o uso da linguaxe cotiá e a eliminación das barreiras psicolóxicas (ansiedade, inhibición, baixa autoestima) que dificultan a aprendizaxe. Isto lévase a cabo fundamentalmente por medio da creación dunha contorna na que os alumnos se sintan cómodos e relaxados (sofás, luz suave, música clásica), xa que se considera que a atmosfera da aprendizaxe inflúe no desenvolvemento da capacidade da memoria. Desde o primeiro momento procurarase a interacción, tanto verbal coma non verbal, así como a creación dun ambiente de confianza e respeto na relación profesor-alumno que facilite a desinhibición. O estudo da gramática redúcese ao mínimo, e a aprendizaxe concéntrase na adquisición de vocabulario e no desenvolvemento das destrezas de comunicación oral. Polo que respecta ás actividades de aula, a suxestopedia adoita recorrer a diálogos, traducións, cancións, dramatizacións ou listaxes de palabras para memorizar. Finalmente, procúrase evitar a corrección inmediata de erros e a avaliación explícita con métodos formais, xa que as dúas perturbarían a atmosfera relaxada na que se pretende que teña lugar a aprendizaxe.