Parámetro

Dentro do modelo gramatical da teoría da rección e o ligamento desenvolvido por Noam Chomsky a comezos dos anos 80 do século pasado, un parámetro é un compoñente da gramática universal cuxa especificación varía dunhas linguas a outras dentro duns límites claramente definidos. Así, o parámetro do núcleo determina que existan linguas nas que o núcleo dunha frase é sempre o seu primeiro elemento (por exemplo, en galego a preposición é o elemento inicial dunha frase preposicional: “en” casa) e outras nas que o núcleo ocupa a posición final (por exemplo, en xaponés: Nihon nin, literalmente “Xapón en”); o parámetro do suxeito nulo determina que haxa linguas que teñen oracións declarativas finitas sen suxeito explícito como, por exemplo, o galego (Son o mestre) e linguas que non admiten esta posibilidade, como o inglés (I am the teacher).