Patrón fixo ou estándar de carácter xeral que serve de referente ou marca as pautas de conduta que debe seguir un individuo. A imitación dun determinado modelo (ben sexa o pai, a nai, un profesor ou un amigo) forma parte das diversas etapas do desenvolvemento e formación do individuo.
En ensino e aprendizaxe de linguas, un modelo a imitar polo estudante pode ser a pronuncia ou acento dun falante nativo ou do docente. Asemellar a propia produción lingüística ás pautas marcadas polo modelo constitúe o obxectivo principal tanto do discente como do docente, posto que hai que ter en conta que no ensino de linguas sempre se imparte un determinado modelo lingüístico (por exemplo, a variedade estándar do inglés británico ou do americano, ou a variedade do español falado na Península ou o falado en América do Sur).
Dale, P. S. 1980. Desarrollo del lenguaje: Un enfoque psicolingüístico. México D F: Trillas.