Formación de conceptos

Proceso de grande importancia no desenvolvemento cognitivo do individuo. Ten lugar durante a infancia e consiste na categorización da realidade por parte da persoa para facilitar a súa comprensión e a interacción co mundo que lle rodea. A formación de conceptos implica a organización dos distintos estímulos recibidos en grupos ou conxuntos de categorías ou clases que posúen unhas características ou atributos comúns. Tanto a asignación a unha ou outra categoría como a capacidade para discernir os atributos de cada clase é unha tarefa que leva a cabo o propio individuo. Os conceptos organízanse de xeito xerárquico en función do seu grao de xeneralidade; así, por exemplo, flor é un concepto de carácter máis xeral que rosa, pero o concepto planta é aínda máis xeral e, xa que logo, englóbao. A formación de conceptos ten moita importancia no estudo e explicación de procesos cognitivos tales como a percepción, a memoria ou a capacidade lingüística.

A formación de conceptos no ser humano é un paso esencial na súa evolución lingüístico-cognitiva, ata tal punto que se converte no requisito previo fundamental para o desenvolvemento das súas capacidades lingüísticas (con referencia ás catro destrezas). Gagné e Piaget estudaron este proceso no neno como obxectivo principal do seu desenvolvemento verbal e non verbal. A medida que o neno vai crecendo (aínda que non necesariamente de forma paralela ao crecemento cronolóxico), vai adquirindo maior capacidade de conceptualización, o cal lle permite formular xeneralizacións ou abstraccións a partir das súas experiencias e a súa actividade psicomotora.