Aprendizaxe mixta

Método de ensino-aprendizaxe que consiste na combinación de elementos propios dun curso presencial con outros característicos do ensino virtual. En certo sentido, é o resultado natural e  esperable da evolución dos métodos pedagóxicos nun contexto de rápido desenvolvemento da Internet e as tecnoloxías da información e a comunicación en xeral. A incorporación de ferramentas e recursos didácticos dispoñibles a través da rede é neste momento moi habitual en case calquera contexto de aprendizaxe. O modo e a intensidade coa que esta integración se produce dependen en boa medida das preferencias e as necesidades específicas do docente e os  discentes. En principio, o carácter híbrido dun curso pode concretarse en case calquera aspecto da súa organización. Existen, por exemplo, ferramentas e contornas virtuais que facilitan a xestión do ensino no que respecta á organización dos alumnos en grupos, a entrega e devolución de tarefas comentadas, etc. A explicación de contidos tamén pode verse potenciada con recursos multimedia que permitan que unha parte significativa da aprendizaxe teña lugar fóra da aula (véxase clase invertida). A avaliación, a autoavaliación e mesmo a avaliación entre compañeiros pode realizarse a través de probas en liña dispoñibles en plataformas virtuais de ensino que están hoxe á orde do día. Finalmente, existen multitude de ferramentas de comunicación, tales como chats, foros de discusión, correo electrónico, etc. que facilitan a interacción entre os participantes nun curso e contribúen a crear un sentido de comunidade que pode estenderse máis aló da aula.

A introdución das novas tecnoloxías na aula resulta en si mesma unha fonte adicional de motivación e facilita o desenvolvemento de destrezas relacionadas coa comunicación e a xestión da información cada vez máis necesarias no mundo laboral actual. Incrementa ademais a flexibilidade da proposta docente, ao facilitar o acceso personalizado aos contidos e actividades dun curso e enriquecer a variedade de estratexias de aprendizaxe ás que se adapta. Esixe, doutra banda, unha competencia técnica mínima por parte de todos os implicados e acceso adecuado aos medios, condicións que poden non darse en grao suficiente en todos os contextos.