Hipótese da orde natural

Esta hipótese mantén que na adquisición da primeira lingua os nenos seguen unha orde natural. Os estudos sobre morfemas desenvolvidos nos anos 70 do século pasado mostraban a existencia nas distintas linguas dunha orde fixa na adquisición de varios morfemas ou elementos flexivos das mesmas. Iso quere dicir que esta adquisición pasa por diferentes estadios ou etapas; así, por exemplo, a adquisición das formas de pasado en inglés atravesa primeiro unha fase de escaso uso de formas regulares, incluíndo sobrexeneralizacións ata chegar á adquisición total do morfema.

Os estudos sobre a orde natural aplicáronse posteriormente á segunda lingua. As investigacións de Krashen mostraron que certos morfemas en inglés son adquiridos antes que outros; así, por exemplo, as formas en -ing e os plurais adquírense antes que os verbos auxiliares ou que a terminación -s da terceira persoa do singular do presente simple. En termos semellantes estudouse a orde de adquisición do español, o francés e o alemán, por exemplo. Esta hipótese foi obxecto de serias críticas; entre elas destacan a ausencia de estudos do contexto relativo ao método de investigación, a limitación da investigación a uns morfemas determinados e a carencia dunha base teórica firme e coherente.