Bloom, B. (ed.) 1979. A Taxonomy of Educational Objectives. Handbook 1, Cognitive Domain. New York: McKay. 2nd edition.
Nos anos 50 do século pasado, Benjamin S. Bloom e mais un amplo elenco de colaboradores de universidades americanas elaboraron unha clasificación funcional dos obxectivos aos que a educación pode referirse, tanto no eido do coñecemento como no da afectividade ou da psicomotricidade. A devandita clasificación ten dúas utilidades principais: por unha banda, contribuír a unha mellor comprensión da complexidade de elementos presentes en calquera acto educativo e, por outra, facilitar na práctica a formulación, orientación e organización dos obxectivos que os profesores deben definir previamente ás súas clases.
A taxonomía proposta organiza os obxectivos, dentro do eido do coñecemento, en seis tipos fundamentais:
- coñecemento,
- comprensión,
- aplicación,
- análise,
- síntese, e
- avaliación.
Cada un deles leva asociadas unha serie de aptitudes e capacidades intelectuais que se formulan desde o punto de vista normativo, é dicir, que “deben ser adquiridas” polo alumno. Así, lembrar, memorizar ou saber definir son habilidades relativas ao coñecemento; transferir o aprendido a outros ámbitos, identificar metáforas e expresións simbólicas, interpretar mensaxes, extrapolar informacións máis aló dos datos concretos, e descubrir tendencias perante fenómenos constantes son capacidades que pertencen á comprensión; diferenciar feitos de hipóteses, interrelacionar ideas, e descubrir relacións recíprocas entre diversos elementos asócianse á análise; expoñer de xeito estruturado as ideas, elaborar hipóteses ou modificalas consonte aos datos, xeneralizar e representar simbolicamente o que se afirma pertencen á síntese; e axuizar a precisión dun exame, descubrir erros lóxicos nunha exposición, e comparar teorías e feitos diferenciados son habilidades asociadas á avaliación.
Entradas relacionadas:
Bibliografía: