Proxecto Educativo de Centro (PEC)

Documento que, xunto co Proxecto Curricular de Centro (PCC) e o Regulamento de Réxime Interno (RRI), conforma no sistema educativo español actual o denominado Proxecto de Centro, o cal fai explícitos os obxectivos institucionais con respecto ao sistema escolar e á comunidade educativa. A diferenza do PCC (de natureza técnico-didáctica e cuxa elaboración corresponde aos equipos docentes), o PEC é de carácter ideolóxico e organizativo. Nel contéñense formulacións educativas de tipo xeral, así como valores, pautas de conduta e actitudes asumidas por todos os membros da comunidade escolar, polo que a súa elaboración é responsabilidade de todos eles, e lévase a cabo a través dos órganos de goberno persoais (Director, Xefe de Estudos, Secretario) e colexiados (Claustro e Consello Escolar), en colaboración cos órganos de coordinación (Departamentos, Comisión de Coordinación Pedagóxica). Esta última encárgase fundamentalmente de asegurar a coherencia entre o PCC, os Proxectos Curriculares de Etapa e as programacións anuais. Os órganos persoais e colexiados participan tamén na elaboración do RRI (Regulamento de Réxime Interno), que é de carácter normativo, é dicir, establece unha serie de preceptos e instrucións para regular a convivencia da comunidade escolar e posibilitar a posta en práctica do PEC e do PCC.

Outros documentos que compoñen o Proxecto Educativo de Centro son: a Programación Xeral de Actividades do Centro (PGA ou Plan Anual, que contén a planificación para un curso escolar), o Orzamento (que recolle as previsións de gastos e a distribución dos recursos económicos) e a Memoria (informe no que se avalían as actuacións e propostas).