Dislexia

Ocasionalmente emprégase este termo nun sentido amplo con referencia a un conxunto de trastornos que poden afectar á comprensión da linguaxe escrita. Adoita diferenciarse entre a chamada dislexia evolutiva e a dislexia adquirida. O primeiro destes termos refírese ás dificultades de lectura que experimentan nenos de intelixencia normal en ausencia de factores entorpecedores da aprendizaxe como puidesen ser un medio socialmente inadecuado ou a falta de motivación. A denominación “dislexia adquirida”, empregada en ocasións como simple sinónimo de alexia, designa aqueles trastornos que son resultado dunha lesión cerebral.