Xuízo sobre a gramaticalidade dunha forma lingüística

Valoración intuitiva que fai un falante sobre a aceptabilidade dunha forma lingüística de acordo coas normas gramaticais da súa lingua. Unha convención gráfica moi estendida é o uso do asterisco “*” para marcar aquelas secuencias consideradas inaceptables ou “agramaticais” como, por exemplo, en galego, *nenos van á escola primaria desde os seis anos. O asterisco indica que a construción é gramaticalmente incorrecta, e a razón neste caso é a ausencia dun artigo determinado que acompañe ao sintagma nominal que desempeña a función de suxeito. En gramática xenerativa empréganse a miúdo probas consistentes en baterías de exemplos sobre os que os falantes nativos emiten un xuízo de gramaticalidade como método para acceder á competencia lingüística subxacente. Con todo, o seu emprego para determinar a estrutura da competencia nunha segunda lingua é obxecto de debate xa que, segundo algúns investigadores, a actuación neste tipo de probas non é necesariamente un reflexo directo da competencia na L2, que é ademais pouco homoxénea duns individuos a outros e moi variable.