Entrada-produción

(Tamén chamados aducto e educto). Son termos usados para referirse á lingua ou formas lingüísticas ás que o alumnado está exposto a través dos sentidos do oído ou da vista, xunto con aqueles segmentos da lingua que é capaz de articular e/ou escribir. Sen recibir e asimilar o aducto, non existe aprendizaxe. Para que haxa asimilación o alumnado debe ser receptivo á lingua de entrada. Esta debería ser comprensible, auténtica e interesante. Canto máis comprensible sexa a entrada de lingua recibida, maior asimilación haberá por parte do estudante.

O termo produción (tamén denominado educto ou output) fai referencia ao que o estudante produce oralmente ou por escrito no idioma que está aprendendo. Para aprender unha lingua son imprescindibles tanto a práctica continuada (a produción) como a entrada (o aducto).