Contacto de linguas

Situación na que falantes de linguas diferentes interactúan con frecuencia como resultado de movementos migratorios ou pola súa proximidade xeográfica. Adoita dar lugar a situacións de bilingüismo e a diferentes graos de influencia mutua dos sistemas lingüísticos empregados. O contacto de linguas está estreitamente relacionado coa aprendizaxe dunha lingua estranxeira. En primeiro lugar, porque se poden dar situacións de aprendizaxe por simple contacto, sen que medie ningún marco de ensino formal. En segundo lugar, porque  á hora de aprender unha lingua estranxeira o aprendiz emprega en parte os recursos dos que dispón na lingua ou linguas que xa coñece (patróns morfológicos, sintácticos, fonológicos, etc.), o que significa que usará unha variedade da lingua distinta á empregada polos falantes nativos.