Centro Ramón Piñeiro

O Centro Ramón Piñeiro para a Investigación en Humanidades (CRPIH, antes denominado Centro de Investigacións Lingüísticas e Literarias Ramón Piñeiro) é unha institución pública dedicada ao fomento da lingua e a cultura galegas. Nos diferentes proxectos e actividades que leva a cabo colaboran bolseiros, profesores universitarios e profesores de ensino medio. Entre os proxectos relacionados coa lingua e a literatura galegas que se están a desenvolver no centro cómpre salientar o Arquivo Galicia Medieval (sobre prosa e lírica medieval galego-portuguesa), proxectos lingüísticos como a BILEGA (“Bibliografía Informatizada da Lingua Galega”), o CORGA (“Corpus de Referencia do Galego Actual”), un etiquetador e lematizador do galego actual que permita a análise automática da lingua, o CoToVía (un sintetizador de voz para o galego), dicionarios de lingua e de literatura, edicións de textos galegos, etc. Polo que respecta ao ensino de linguas, a aportación máis importante da institución é o “Proxecto para a avaliación e aprendizaxe de galego”, que comezou no 2004 co obxectivo de deseñar as probas, os protocolos de actuación e os descritores para os novos certificados oficiais de lingua galega que acreditan o coñecemento da lingua de acordo cos estándares fixados marco europeo común de referencia para as linguas: aprendizaxe, ensino e avaliación e mais pola Asociación de Avaliadores de Linguas Europeas, á que pertencen os membros do proxecto.