Intelixencia Artificial (IA)

Unha Intelixencia Artificial (IA) é un sistema deseñado para realizar tarefas que requiren intelixencia humana, como recoñecer patróns ou resolver problemas. No ensino de linguas, pode facilitar a aprendizaxe personalizada, adaptar contidos ou avaliar respostas (por exemplo, a plataforma Duolingo). A Intelixencia Artificial Xenerativa (IAX) é capaz de crear textos, imaxes ou diálogos a partir de instrucións, o que permite xerar exemplos, simular conversacións ou corrixir textos (como fai o asistente Claude).

A IA está a transformar a aprendizaxe de linguas estranxeiras ao ofrecer ferramentas personalizadas, útiles tanto na aula como para a autoaprendizaxe. Plataformas como Duolingo adaptan o contido ao nivel do estudante, e ferramentas com ChatGPT, DeepL Write, Write & Improve (Cambridge) ou QuillBot permiten practicar a escritura ofrecendo correccións automáticas, suxestións de estilo e retroalimentación inmediata. Por exemplo, se un estudante escribe “I very like this book”, estas ferramentas detectarán o erro e suxerirán. “I really like this book”. Poden usarse para tarefas de revisión textual, lectura crítica ou resumo asistido, onde o alumnado compara as súas versións coas propostas pola IA.

Para a expresión oral, ferramentas como ChatGPT poden simular conversacións en diferentes contextos (cafetería, entrevista de traballo), actuando como interlocutores ou titores. O estudante pode pedir correccións, suxestións ou explicacións gramaticais. Aplicacións como Tandem e HelloTalk permiten a interacción con falantes reais e inclúen funcións de corrección automática e tradución. ELSA Speak analiza a pronunciación, detecta erros fonéticos específicos e propón exercicios correctivos (por exemplo, pode corrixir a pronunciación errónea do fonema /ð/ en “the”), e TalkPal AI é un chatbot (asistente de conversación ou axente conversacional) que permite manter conversas orais, elixindo nivel, tema e tipo de retroalimentación.

O profesorado tamén pode usar estas ferramentas para deseñar materiais didácticos, avaliar tarefas ou adaptar textos a distintos niveis. Asistentes como ChatGPT, Claude ou Gemini son capaces de xerar preguntas de comprensión e reformular textos de acordo co nivel requirido. Textivate permite crear actividades interactivas a partir de textos,Diffit adapta lectura a diferentes niveis, e ferramentas como MagicSchool AI e Eduaide.ai poden xerar RÚBRICAS, programacións de aula e materiais adaptados para alumnado con necesidades especiais. Para revisar producións escritas, Write & Improve e Grammarly proporcionan correccións formativas e suxestións específicas.

O uso da IA no ámbito educativo xera dilemas éticos e pedagóxicos. É importante empregala de xeito crítico e fundamentado, e entender que estas ferramentas non substitúen a interacción humana nin captan todas as sutilezas da linguaxe. Ademais, cómpre ter en conta aspectos como a privacidade dos datos, o prexuízo algorítmico e a dependencia tecnolóxica. Por iso, é fundamental integrar a IA como apoio dentro de enfoques comunicativos e pedagóxicos sólidos, fomentando un uso crítico e creativo por parte do alumnado.