Gimeno Sacristán, J. & Pérez Gómez, A. 1992. Comprender y transformar la enseñanza. Madrid: Morata.
Tamén ensinanza.
Acto mediante o cal o docente mostra algo aos discentes. Como acción pedagóxica implica tamén o proceso de aprendizaxe. Se nos fixamos no resultado, este termo sería equivalente a instrución.
Son cinco os elementos que constitúen o proceso de ensino:
- persoa docente ou ensinante que mostra algo;
- acto docente mediante o cal a persoa que ensina leva a cabo o proceso de ensino;
- método de ensino, é dicir, procedemento mediante o que se realiza o proceso;
- obxecto ou materia que se ensina; e
- persoa á que se ensina.
Aínda que todos estes elementos son necesarios, realmente o ensino non leva implícito en todos os casos a consecución de aprendizaxe. Aínda que ambos os procesos están intimamente relacionados, pode haber ensino sen aprendizaxe, e viceversa. Fálase de distintos tipos de ensino, tales como ensino individual (un docente cun discente), colectivo (un docente con moitos alumnos levando a cabo a mesma actividade), individualizado (un docente con moitos alumnos realizando tarefas diferentes), globalizado, experiencial, non directivo, etc. Do mesmo xeito, aparecen referencias a distintas interpretacións dos seus sentidos e efectos, isto é, ensino como transmisión cultural, como adestramento nunha serie de destrezas e habilidades, como produtor de cambios conceptuais, como comunicación, etc.
Bibliografía:
Göttler, J. 1967. Pedagogía sistemática. Barcelona: Herder. 4th edition.
Joyce, B. & Weil, M. 1985. Modelos de enseñanza. Madrid: Anaya.