Dependencia do ámbito de acción

Tipo de estilo cognitivo. Os aprendices que mostran dependencia do ámbito de acción realizan unha aprendizaxe de tipo global, é dicir, fíxanse máis no conxunto que nas súas partes. Esta clase de estilo cognitivo oponse á independencia do ámbito de acción; neste caso os estudantes empregan un método de tipo analítico, prestando maior atención aos distintos elementos que conforman o todo. Os resultados das investigacións levadas a cabo nesta dirección parecen apuntar a que os aprendices independentes do ámbito de acción aprenden mellor en contextos formais como o da clase. Na aprendizaxe de linguas, os estudantes que mostran independencia do ámbito de acción manifestan unha maior habilidade para unha aproximación analítica ao material, para percibir os seus compoñentes e a relación entre os mesmos ou para identificar os aspectos máis significativos da lingua. Pola súa banda, os estudantes con dependencia do ámbito de acción, máis sociables e propensos ás relacións interpersoais, tenden a aproveitar mellor as situacións de aprendizaxe derivadas da interacción con outros individuos para mellorar a súa competencia lingüística, compensando así a falta dunha orientación analítica na aprendizaxe de idiomas.