Hess, N. 2001. Teaching Large Multilevel Classes. Cambridge: Cambridge University Press.
A definición dun grupo numeroso é relativa. Nalgunhas institucións considérase que 20 estudantes son moitos, mentres que noutras o número podería ser desde 50 ata máis de 100. Con todo, o importante é o que o docente percibe como un grupo numeroso. En xeral, os grupos numerosos amosan dificultades específicas relacionadas sobre todo co mantemento da disciplina e a motivación do alumnado. Para saír ao paso dos posibles problemas, o profesor debe empregar desde un principio actividades que lle permitan coñecer o mellor posible ao seu alumnado (xogos de presentación, cuestionarios sobre intereses persoais, etc.) e debe tratar de crear un clima de aula que permita utilizar con regularidade o traballo en grupos con independencia do profesor. Para este fin, a disposición adecuada do mobiliario dentro da aula e o emprego de actividades comunicativas que fomenten a participación activa do alumnado xogan un papel moi importante. Unha dificultade engadida no caso dos grupos numerosos é que tenden a presentar tamén un grao elevado de heteroxeneidade.
Nolasco, R. & Arthur, L. 1988. Large Classes. Basingstoke: Macmillan.