Selecciona unha inicial para ver as entradas correspondentes:
A B C D E F G H I K L M N O P R S T U V W X Z

Comportamento en forma de U

Definición:

Tipo de comportamento que mostran os alumnos dunha lingua estranxeira cando ao principio da súa aprendizaxe producen unha forma da lingua meta, posteriormente retornan á propia da interlingua e finalmente volven producir a forma da lingua meta. Este proceso tería o aspecto gráfico dunha U, polo que se denomina comportamento en forma de U. Un exemplo que se adoita citar é o estudo de Kellerman con estudantes holandeses de inglés. Nas súas primeiras fases de adquisición da lingua, os estudantes aprenderon a utilizar o verbo break tanto no seu uso transitivo (John broke the vase) como ergativo (the vase broke), unha dobre construción que igualmente admite o verbo equivalente en neerlandés. A medida que adquirían un maior dominio de estruturas complexas da lingua meta, os estudantes empezaron a descartar o uso ergativo, que posiblemente identificaban como unha construción froito da interferencia da L1. Este efecto tendía a reducirse co tempo e cunha maior exposición á lingua estranxeira, ata volver utilizar con naturalidade as dúas estruturas do inglés adquiridas orixinalmente.

Bibliografía: 

Kellerman, E. 1985. “If at First you Do Succeed.”, in Gass, S. & Madden, C. (eds.). Input in Second Language Acquisition. Rowley, Mass.: Newbury House, pp. 345-354.

Correspondencia noutros idiomas
Español: 
Comportamiento en forma de U
Inglés: 
U-shaped behaviour
Francés: 
Comportement en forme de U
Alemán: 
U-förmiges Verhalten
Italiano: 
Comportamento a forma di U
Polaco: 
Zachowanie u-kształtne
Portugués: 
Comportamento em forma de U
Ruso: 
U-образное поведение
Entrada anterior / seguinte:

Como citar esta páxina

Palacios Martínez, Ignacio (dir.), Rosa Alonso Alonso, Mario Cal Varela, Yolanda Calvo Benzies, Francisco Xabier Fernández Polo, Lidia Gómez García, Paula López Rúa, Yonay Rodríguez Rodríguez & José Ramón Varela Pérez. 2019. Dicionario electrónico de ensino e aprendizaxe de linguas. ISBN 978-84-09-10971-5. (Dispoñible en líña en https://www.dicenlen.eu/gl/diccionario/entradas/comportamento-forma, con data de acceso 29/03/2024).