Gramaticalización

Proceso diacrónico gradual por medio do cal unha unidade léxica adquire un significado gramatical, perdendo parte ou a totalidade da súa identidade semántica e fonolóxica orixinal, e podendo chegar a converterse nun afixo flexivo. Trátase dun cambio lento que non sempre se completa en todas as súas fases pero que, para a maioría dos autores, é unidireccional. Como exemplos deste proceso podemos citar a expresión do futuro en inglés por medio da forma will seguida dun infinitivo, resultado da gramaticalización dunha construción con este verbo que en inglés antigo significaba “querer”: I will sing = “(eu) cantarei”. De modo similar, o futuro sintético de linguas románicas como o francés (chanterai), o español (cantaré) ou o galego (cantarei) é o resultado do proceso de gramaticalización dunha estrutura perifrástica formada por un infinitivo e unha forma do verbo habere, que xa existía en latín vulgar e cuxo significado orixinal era “hei de, teño que” + infinitivo (teño que cantar).