AILA

Abreviatura francesa correspondente á Association Internationale de Linguistique Appliquée, é dicir, “Asociación internacional de lingüística aplicada”. Fundada en Francia en 1964, é unha federación internacional de asociacións dedicadas á promoción e o desenvolvemento da Lingüística Aplicada nos seus diversos ámbitos. Celebra un congreso internacional cada tres anos e é a responsable editorial da revista AILA Review e da serie de monografías AILA Applied Linguistics Series. Entre 1998 e 2004 publicou un boletín de novas, AILA Newsletter, que foi substituído pola páxina web da Asociación: http://www.aila.info/en/.