Selecciona unha inicial para ver as entradas correspondentes:
A B C D E F G H I K L M N O P R S T U V W X Z

Pidgin

Definición:

1. Tamén, ocasionalmente, denominado sabir. Un pidgin é unha lingua, en xeral carente de falantes nativos, que se desenvolve en situacións de contacto entre grupos de persoas que non posúen unha lingua común. Formalmente adoita caracterizarse por un vocabulario reducido e un compoñente morfosintáctico moi simplificado e regular. Nas situacións de contacto prolongado, o pidgin pode experimentar certo grao de elaboración para satisfacer un número crecente de necesidades comunicativas, dando lugar ao que se coñece como pidgin expandido. Algúns pidgins expandidos son hoxe linguas auxiliares de vital importancia en certas áreas multilingües e son empregados por un número elevado de falantes como, por exemplo, o Tok Pisin en Papúa Nova Guinea, falado por máis de catro millóns de persoas. Cando un pidgin se converte na lingua materna dun grupo, xeralmente sofre un proceso de expansión e elaboración, e pasa a ser un crioulo. A crioulización implica a expansión do vocabulario e o sistema gramatical.

Entradas relacionadas: 
Bibliografía: 

Holm, J. A. 1989. Pidgins and Creoles. Cambridge: Cambridge University Press.

Romaine, S. 1988. Pidgin and Creole Languages. London; New York: Longman.

2. Sistema lingüístico reducido e limitado, utilizado polo neno na súa aprendizaxe da L1 ou ben por un adulto no estudo da L2. ⇒ tamén pidginización.

Entradas relacionadas: 
Bibliografía: 

Ellis, R. 1994. The Study of Second Language Acquisition. Oxford: Oxford University Press.

Correspondencia noutros idiomas
Galego: 
Pidgin
Inglés: 
Pidgin
Francés: 
Pidgin
Alemán: 
Pidgin/ Vereinfachte Mischsprache
Italiano: 
Pidgin
Polaco: 
Pidgin/Pidżyn
Portugués: 
Pidgin
Entrada anterior / seguinte:

Cómo citar esta páxina

Palacios Martínez, Ignacio (dir.), Rosa Alonso Alonso, Mario Cal Varela, Yolanda Calvo Benzies, Francisco Xabier Fernández Polo, Lidia Gómez García, Paula López Rúa, Yonay Rodríguez Rodríguez & José Ramón Varela Pérez. 2019. Dicionario electrónico de ensino e aprendizaxe de linguas. (Dispoñible en líña en https://www.dicenlen.eu/gl/diccionario/entradas/pidgin, con data de acceso 08/12/2019).